Universidade virtual

As novas tecnoloxías contan cunha grande implantación na Universidade de Vigo, que pon a disposición do seu alumnado, persoal docente e investigador e persoal de administración e servizos, un bo número de servizos virtuais, coa finalidade de facilitar trámites ou, simplemente, de achegarse dun xeito sinxelo aos seus usuarios e usuarias.

Así, a Universidade de Vigo permítelle ao seu alumnado formalizar a súa matrícula a través de internet, así como, consultar cualificacións a través da secretaría virtual. A teledocencia a través da plataforma Faitic é un complemento á docencia presencial, cada vez máis utilizado por alumnado e persoal docente. Ademais estes, como o resto da comunidade universitaria e a sociedade en xeral, contan cun diario dixital, o Duvi, para manterse informados de todo o que sucede nos tres campus que conforman a Universidade de Vigo.